சித்த வைத்தியமா?, பெரியவா அனுக்ரஹமா?

  

(சதா தூங்கும், மற்றும் உணர்ச்சி இல்லாத பெண்ணுக்கு, ஒரு நாஸ்திக சித்த வைத்தியரிடம், வைத்தியம் பார்க்க சிபாரிசு செய்த பெரியவா)

கட்டுரையாளர்-ஸ்ரீமடம் பாலு

புத்தகம்- காஞ்சி மகான் தரிசனம்.

தட்டச்சு-வரகூரான் நாராயணன்.

திருச்சி அன்பர், தன் பெண்ணை அழைத்துக்கொண்டு தரிசனத்துக்கு வந்தார்.

"பொண்ணுக்கு என்ன கோளாறுன்னே தெரியலை. காலையில் பத்து மணி வரை தூங்கறா வேலையே செய்யறதில்லை. அடிச்சாலும் உடம்பில் உறைக்கலை. உற்சாகமாகவும் இல்லே. பத்து டாக்டர்களிடம் காண்பிச்சாச்சு. எந்த மாறுதலும் இல்லே. கல்யாணம் செய்து கொடுத்துடணும்னு யோசனையும் இருக்கு. எவன் வந்து கட்டிப்பான்? பெரியவா அனுக்ரஹம் பண்ணணும்."

அலோபதி வைத்தியத்தை நிறுத்தச் சொன்னார்கள் பெரியவாள். காஞ்சிபுரத்திலுள்ள பெரிய சித்த வைத்தியர் சித்சபை என்பவரிடம் வைத்தியம் செய்து கொள்ளச் சொன்னார்கள்.

சித்சபை வைத்தியசாலைக்குப் போனார்கள்.

வைத்தியர் சித்சபை, பெரியவாள் தன்னிடம் ஒரு நோயாளியை அனுப்பி வைத்து மருத்துவம் செய்து கொள்ளச் சொல்லியிருக்கிறார்களே என்று ஆச்சர்யப்பட்டார். காரணம், அவர் பரம நாஸ்திகர்.

அந்த நித்திரைப் பெண்ணை, தன் வைத்தியசாலையில் தங்க வைத்து, சிகிச்சை தொடங்கினார்.

பெண்ணுக்கு உணவு, பச்சைக் கறிகாய், பழங்கள், பச்சைப்பால்.....இவைதான். அக்கினியில் பக்குவமான எந்தப் பொருளையும் சாப்பிடக்கூடாது. இப்படியே பத்து நாள்கள் போல சிகிச்சை நடந்ததும், அந்தப் பெண்ணுக்குப் பூரண குணமாகி விட்டது. எடையும் குறைந்தது. சித்சபைக்கு நன்றி சொல்லி விட்டு, பெரியவாளிடம் தரிசனத்துக்கு வந்தார்கள்.

"பெரியவாளுடைய..கிருபையினாலே...பெண் நல்லபடியாகி விட்டாள்."-திருச்சி அன்பர்.

"நான் என்ன பண்ணினேன்? வைத்தியர் அல்லவா, மருந்து கொடுத்தார்.." (தன்னை மறைத்துக் கொள்வதிலேயே குறி. தன்னை முன்னிலைப்படுத்தவே மாட்டார்கள்)

"கல்யாணம் ஆகணும்.."-அன்பர்.

நிறைய குங்குமப் பிரசாதம் கொடுத்தார்கள்.-பெரியவா.

பல மாதங்களுக்குப் பிறகு, அந்த 'நித்ரா தேவி' தரிசனத்துக்கு வந்தாள், புருஷன் குழந்தையுடன்.

பெரியவா குழந்தையைக் கடாக்ஷித்தார்கள்.

"முழிச்சிண்டிருக்கானே, தூங்கறானோ, இல்லையோ?"--பெரியவா.

குடும்பமே ஆனந்தத்தில் மூழ்கியது. ஹர ஹர சங்கர 🙏